Ullur

Ágætu Ullungar, félagsfudnur verður næstkomandi þriðjudagskvöld þar sem fjallað verður um mót vetrarins, æfingar, væntanlega opnuð ný heimasíða ofl. Umræður verða um starf og stefnu okkar framundan. Mikilvægt er að sem flestir mæti og taki þátt í umræðum. Fundurinn verður í Íþróttamiðstöðinni í Laugardal, Engjavegi 6, salur C á þriðjuhæð (þar sem við höfum haldið aðalfundi), fyrsta bygging sem komið er að.

Þóroddur F.

Stefnum á æfingu á morgun þriðjudag kl 18, sjáum hvernig mæting verður og hvort tímasetningin hentar. Veit að nokkrir þurfa að vera komnir í bæinn kl 20 vega fundar í Landsmótsnefnd og það er ekkert sem bannar að mæta fyrr eða seinna.

Þóroddur F.

Þann 4. desember næstkomandi heldur SKA Ofurgöngu 2010, en það verður í annað skipti sem mótið er haldið, á síðasta ári var það Sigurbjörn Þorgeirsson sem stóð uppi sem sigurvegari en hann lagði að baki 79,8 km á rétt rúmum 5 klukkustundum. Aðstæður hér í Hlíðarfjalli eru að verða mjög góðar miðað við árstíma, talsvert mikill snjór og troðnar brautir.

Ofurganga SKA er skíðagöngukeppni þar sem markmiðið er að ganga sem flesta kílómetra. Startað verður kl. 10 með hópstarti, markinu verður lokað klukkan 15 og keppendur ljúka þeim hring sem þeir eru byrjaðir á. Í þessu móti gilda almennar reglur um mótahald eins og t.d. einungis eitt skíðapar á hvern keppanda, mönnum er frjálst að smyrja skíðin sín sjálfir, án aðstoðar. Keppendum er frjálst að stoppa eins oft og þeim hentar eða skipta göngunni upp í eins marga hluta og hverjum og einum hentar.
Keppt verður í kvenna- og karlaflokki 16 ára og eldri.
Drykkjarstöð verður við gönguhúsið og verður boðið uppá orkudrykk, brauð og súpu.
Þátttökugjald er 1500kr. Skráning og allar frekari upplýsingar í netfanginu: ganga@internet.is

Árlegar æfingabúðir verða á vegum Fossavatnsgöngunnar 25.- 28. nóv.

Fimmtudaginn 25. verður æfing 19-21. Þátttökugjald kr. 10.000.

Föstudag og laugardag frá 10 að morgni fram að kvöldmat og 10-12 á sunnudeginum. Nánari upplýsingar eru á www.fossavatn.com og skráining fyrir 20. nóv. á fossavatn@fossavatn.com. Frekari uppl. hjá Kristbirni (Bobba) í síma 8960528.

Ullungar hvattir til að fjölmenna og hafa samráð um ferðir og gistingu til að gera ferðina eins ódýra og kostur er.

Komin er dagskrá fyrir þjálfaranámskeið SKÍ og opna landsliðsæfingu í Reykjavík sem byrjar 29.10. Fyrsti bóklegi þáttur mun hefjast föstudagskvöld um 19.00. Bóklegi þátturinn verður á ÍSÍ og verklegi þátturinn sennilega þar nálægt. Þátttakendur hafi með sér æfingaföt og hjólaskíði þau sem möguleika hafa á því.

Kostnaður við námskeið er 15.000 kr fyrir þá sem búa á höfuðborgarsvæðinu og 10.000 kr fyrir þá sem koma langt að.

Nákvæm tímasetning mun berast á morgun, mánudag. Æfingin er opin og kostar ekkert og stendur fram á þriðjudag. Þeir sem vilja fá dagskrána hafi samband við undirritaðan.

Þóroddur F.